«السيسي» يوجه بمنح الرخصة الذهبية لكل المستثمرين المتقدمين لمدة 3 أشهر

قدم الرئيس عبد الفتاح السيسي، التحية إلى القطاع الخاص على مبادرة زيادة الأجور، وفقًا للقرارات التي أصدرتها الحكومة مؤخرًا بمبلغ 300 جنيه، وذلك خلال افتتاح الملتقي والمعرض الدولي الأول للصناعة.

السيسي يوجه ببذل الجهود لإزالة العوائق أمام المستثمرين

وجه السيسي، ببذل كل الجهود بهدف إزالة العوائق أمام المستثمرين، قائلًا: «الرخصة الذهبية لكل من يتقدم 3 شهور ونبذل جهد شوية مع المستثمرين ونراجع، لو الأمور مشيت كويس ولقينا حجم الإنجاز مشجع نقدر نفكر نكمل 3 شهور تانية».

أضاف خلال إطلاق الملتقى والمعرض الدولي الأول للصناعة: «بنشتغل عمل مؤسسي والتجارة والصناعة موجودة وهندي الرخصة دي لكل المتقدمين لمدة 3 شروط، وإحنا بنتحرك كده وبنفتح الباب على أخره وآليات العمل والحوكمة مش زى ما إحنا عاوزين في مصر، والسبب اتكلمنا وقلنا في المؤتمر الاقتصادي مش عاوزينكم تعانوا منه، وكلنا مع بعض ويهمنا البلد تطلع لقدام».

منح الرخصة الذهبية للمستثمرين لمدة 3 أشهر

وجه السيسي، بمنح الرخصة الذهبية لكل المستثمرين الذين تقدموا للحصول عليها لمدة 3 أشهر، موضحًا أنه هناك الكثير من الأنشطة تحتاج إلى دراسات، ومعقبًا: «فيه أنشطة بتتعمل محتاجة دراسات لكن فيه حاجات واضحة جدًا زي الخامات الدوائية والمعدات اللى بنستوردها، حياة كريمة هيتصرف عليها تريليون جنيه، وتحتاج طلمبات وهتحتاج صيانة وما حدش هايبقى قلقان إن المنتج بتاعه هيتعرض لحاجة، لو فيه مشكلة لحد مش هنقف جنبك ولا إيه؟».

وأضاف: «الـ100 مليار دولار بتاع التصدير بعد كام سنة هايبقى الحلم بعيد قوي.. بقالي 7 سنين في الشغلانة دي، وعارف إن المواضيع دي بتأخر وبتضيع علينا فرصة».

وأبدى الرئيس السيسي، استعداد الدولة للدخول كشريك مع بعض المستثمرين في مبادرة ابدأ بهدف تشجيع رجال الصناعة، قائلًا: «يا اللي هتشتغلوا في ابدأ مستعد أخش معاكم بالنص، مش علشان عاوز أخش معاك، لكن علشان أشجعك إن فيه جزء من المخاطرة الدولة معاك فيها، والهدف أيضًا تشجيع رجال الصناعة في مصر، وكل من يحتاج يتحرك معانا إحنا معاك».

أكد الرئيس عبد الفتاح السيسي، أن الأوضاع الحالية لتطوير الصناعات المختلفة تحتاج إلى إجراءات غير تقليدية، قائلًا: «لما اتكلمت عن الرخصة الذهبية قولت خليها 3 شهور.. افتح الإجراءات لمدة زمنية محددة.. واقبل التجاوز والعوار فيها مؤقتًا.. واظبط الدنيا تاني.. بس دي قوة دفع هائلة لمشاريع بتاخد وقت كبير جدًا في فترة زمنية .. حتى لو فيها شيء في العوار».

وتحدث الرئيس عن طموحات العمل في القطاع الصناعي، قائلًا: «قولت قبل ما أجي النهارده.. اعمل أنا مكتب لإدارة المشروعات الصناعية الجديدة.. واقعد على الحاجة لحد ما تخلص.. وأفضل أقول اعمل اعمل اعمل اعمل.. أقل خسارة وأقل خطورة من أني مش اعمل عقبال ما أدرس وأشوف.. بقول الكلام ده لينا كلنا.. للتجارة والصناعة».

وأضاف: «بنتكلم عن معايير مؤسسية لإدارة العمل.. وقد تكون أحيانا معيقة للتقدم.. وحجم الضرر الناتج عنها.. قبل ما اجي قولت اعمل عندي مكتب.. واللى عنده مشروع بـ100 مليون يجيلي على طول.. والدكتور مصطفي عمل كده.. ومش معناها أن الناس مش شغالة».

أكد أن الواقع الذى حدث خلال الـ3 سنوات الماضية يتصور البعض أنها أبرزت تحديات وأزمات ولكنها أظهرت لنا فرص نحتاج الاستفادة منها، قائلًا: «لما حصل موضوع الصراع التجارى فى العالم بينت أن في تحول كبير حتى في أثناء جائحة كورونا ثم الأزمة الروسية الأوكرانية».

وأضاف أن ما يحدث الآن في العالم يشير إلى أن حركة التجارة يعاد تشكيلها وصياغتها، وأن مصر لديها فرصة كمصنع بما تقدمه من تكلفة الإنتاج والتشغيل، متابعًا: «أنا عارف السوق العالمي فيه إيه وحتى في مصر اقدر أعمل إيه، ولما أقول للناس تعالوا في تطوير للإنتاج من خلال اتفاقيات وتسعير الطاقة عندنا والتسهيلات والعمالة المصرية اللي تكلفتها لا تقارن بأي تكلفة ثانية».

ووجه الرئيس السيسي، كلامه لرجال الأعمال والمستثمرين، قائلًأ: «لكم كل الدعم من الحكومة والشعب ومن بعضنا من أجل بلدنا وتواصلنا المستمر هيخلينا نشوف أكتر، وأننا نسمع بعض دون اتهامات تعالوا نسمع بعض، وتعالوا نتحرك لمصلحة مصر المشتركة ولسه بدرى وعندنا فرصة كويسة».